صبح کے مسنون اذکار

ترجمہ: اللّٰہ سب سے بڑا ہے، سب تعریف اللّٰہ ہی کے لئے ہے، اللّٰہ پاک ہے، اللّٰہ کے سوا کوئی معبود نہیں۔

فائدہ: طلوعِ آفتاب کے وقت یہ کلمات کہنا اولادِ اسماعیل علیہ السلام میں سے چار غلام آزاد کرنے سے بہتر ہے۔

(حضرت ابو امامہؓ)

ترجمہ: اللہ وہ ذات ہے کہ اس کے سوا کوئی معبود نہیں، ہمیشہ زندہ رہنے والا، تمام مخلوق کو سنبھالنے والا، نہ اُسے اونگھ آتی ہے نہ نیند۔ آسمانوں اور زمین میں جو کچھ ہے سب اُسی کا ہے… اور وہی عالیشان اور عظمت والا ہے۔

فائدہ: جو صبح پڑھے وہ رات تک اور جو رات پڑھے وہ صبح تک جنات و شیاطین سے پناہ میں رہے گا۔

(المعجم الکبیر للطبرانی: 542)

ترجمہ: قرآن کریم کی آخری تین سورتیں (معوذات): سورۃ الاخلاص، سورۃ الفلق اور سورۃ الناس۔

فائدہ: ”تَکْفِیْکَ مِنْ کُلِّ شَیْءٍ“ یعنی تمہارے لئے ہر چیز سے کفایت ہو جائے گی۔

(ابوداؤد: 5082)

ترجمہ: پاک ہے اللہ کی ذات اور اُسی کیلئے ساری تعریف ہے، اُس کی مخلوق کی تعداد کے برابر، اُس کی ذات کی خوشنودی کے برابر، اُس کے عرش کے وزن کے برابر، اور اُس کے کلمات کی سیاہی کے برابر۔

فائدہ: نبی کریم ﷺ نے فرمایا: یہ چار کلمات دن بھر کے تمام اذکار کے مقابلے میں وزن میں بھاری ہیں۔

(مسلم — حضرت جویریہؓ)

ترجمہ: اللہ کے نام سے ابتداء کرتا ہوں جس کے نام کے ساتھ زمین و آسمان میں کوئی چیز نقصان نہیں پہنچا سکتی، اور وہ سننے والا جاننے والا ہے۔

فائدہ: اُسے اُس دن یا اُس رات کوئی نقصان نہیں پہنچے گا، اور شام تک کوئی ناگہانی آفت پیش نہیں آئے گی۔

(مسند احمد: 474 / ابوداؤد: 5088)

ترجمہ: اے اللہ! تیرے ہی نام سے ہم نے صبح کی اور تیرے ہی نام سے شام کی، تیرے ہی نام سے ہم جیتے اور مرتے ہیں اور تیری ہی جانب لوٹ کر جانا ہے۔

فائدہ: نبی کریم ﷺ صبح کو یہ دعا پڑھا کرتے تھے۔

(ترمذی: 3391)

ترجمہ: ہم نے اسلام کی فطرت، کلمۂ اخلاص، اپنے نبی محمد ﷺ کے دین اور اپنے والد ابراہیم علیہ السلام کی ملت پر صبح کی، جو یکسو مسلمان تھے اور مشرکوں میں سے نہ تھے۔

فائدہ: نبی کریم ﷺ صبح کو یہ دعا پڑھا کرتے تھے۔

(سنن کبریٰ نسائی: 9745)

ترجمہ: اے اللہ! میں تجھ سے نفع دینے والا علم، پاکیزہ رزق اور قبول ہونے والے عمل کا سوال کرتا ہوں۔

فائدہ: نبی کریم ﷺ فجر کی نماز کے بعد یہ دعا پڑھا کرتے تھے۔

(شعب الایمان: 1645)

ترجمہ: اے اللہ! آسمانوں اور زمین کے پیدا کرنے والے، غیب و حاضر کے جاننے والے، ہر چیز کے رب اور مالک! میں گواہی دیتا ہوں کہ تیرے سوا کوئی معبود نہیں، میں تیری پناہ چاہتا ہوں اپنے نفس کے شر سے اور شیطان کے شر اور اُس کے شرک سے۔

فائدہ: نبی کریم ﷺ نے صبح، شام اور بستر پر جاتے وقت پڑھنے کی تلقین فرمائی۔

(ابوداؤد: 5067)

ترجمہ: ہم نے اور ساری سلطنت نے اللہ کیلئے صبح کی، ساری تعریفیں اللہ کیلئے ہیں، اُس کے سوا کوئی معبود نہیں، وہ اکیلا ہے… اے اللہ! میں تجھ سے اِس دن کی اور اِس کے بعد کی بھلائی مانگتا ہوں اور اِس دن اور اِس کے بعد کے شر سے، سستی، بُرے بڑھاپے، جہنم اور قبر کے عذاب سے تیری پناہ چاہتا ہوں۔

فائدہ: نبی کریم ﷺ صبح کو یہ دُعا پڑھا کرتے تھے۔

(ترمذی: 3390)

ترجمہ: میں اللہ کے پروردگار ہونے پر، اسلام کے دین ہونے پر اور محمد ﷺ کے نبی ہونے پر راضی ہوں۔

فائدہ: اللہ تعالیٰ نے ذمہ لیا ہے کہ ایسے شخص کو قیامت کے دن راضی کر دیں گے، اور فرمایا: ”مَنْ قَالَھُنَّ دَخَلَ الْجَنَّۃَ“۔

(مسند احمد: 18967 / مسلم: 34)

ترجمہ: اے اللہ! میرے جسم، میرے کان اور میری آنکھ میں عافیت نصیب فرما۔ تیرے سوا کوئی معبود نہیں۔ اے اللہ! کفر اور فقر سے اور قبر کے عذاب سے تیری پناہ چاہتا ہوں، تیرے سوا کوئی معبود نہیں۔

فائدہ: نبی کریم ﷺ صبح و شام یہ دُعا پڑھا کرتے تھے۔

(ابوداؤد: 5090)

ترجمہ: اے سدا زندہ رہنے والے، اے سب کو سنبھالنے والے! میں تیری رحمت سے فریاد کرتا ہوں، میرے تمام احوال کی اصلاح فرما اور پلک جھپکنے کے برابر بھی مجھے میرے نفس کے حوالے نہ فرما۔

فائدہ: نبی کریم ﷺ نے حضرت فاطمہؓ کو صبح شام پڑھنے کی وصیت فرمائی۔

(مستدرک حاکم: 2000)

ترجمہ: اے اللہ! تُو ہی میرا رب ہے، تیرے سوا کوئی معبود نہیں، تُو نے مجھے پیدا کیا اور میں تیرا بندہ ہوں، جہاں تک ہو سکے میں تیرے عہد و وعدے پر قائم ہوں… میرے گناہ معاف فرما، کیونکہ تیرے سوا کوئی گناہ نہیں بخشتا۔

فائدہ: یہ سید الاستغفار ہے، جو صبح شام پڑھے اور اُسی دن انتقال کر جائے وہ جنتی ہے۔

(بخاری: 6306)

ترجمہ: اے اللہ! میں دنیا و آخرت میں عفو و عافیت کا سوال کرتا ہوں، میرے دین، دنیا، اہل اور مال میں عافیت عطا فرما، میرے عیوب کی پردہ پوشی فرما، میرے خوف کو امن میں بدل دے، اور ہر جانب سے میری حفاظت فرما۔

فائدہ: نبی کریم ﷺ نے صبح شام ان کلمات کو کبھی ترک نہیں فرمایا۔

(ابن ماجہ: 3871)

ترجمہ: میں اللہ تعالیٰ کے تمام کلمات کی پناہ میں آتا ہوں اُس کی پیدا کردہ تمام چیزوں کے شر سے۔

فائدہ: اِن کلمات کے پڑھنے والے کو کوئی موذی چیز نقصان نہیں پہنچائے گی۔

(ترمذی: 3604)

ترجمہ: اللہ کے سوا کوئی معبود نہیں، وہ اکیلا ہے، اُس کا کوئی شریک نہیں، اُسی کیلئے بادشاہت اور تعریف ہے، وہی زندہ کرتا اور موت دیتا ہے، اُسی کے ہاتھ میں ساری بھلائی ہے اور وہ ہر چیز پر قادر ہے۔

فائدہ: فجر کے بعد دس مرتبہ پڑھنے پر سو نیکیاں، سو گناہ معاف، سو درجات بلند اور آفات و شیطان سے حفاظت۔

(مسند احمد: 17990)

ترجمہ: اے اللہ! مجھے آگ (جہنم) سے پناہ عطا فرما۔

فائدہ: فجر کے بعد سات مرتبہ پڑھنے والا اگر اُسی دن فوت ہو جائے تو جہنم سے بری ہو جائے گا۔

(ابوداؤد: 5079)

ترجمہ: اے اللہ! جو نعمت بھی میرے پاس یا تیری مخلوق میں سے کسی کے پاس صبح کے وقت موجود ہے وہ تنہا تیری ہی جانب سے ہے، تیرا کوئی شریک نہیں، پس تیرے ہی لئے ساری تعریف اور شکر ہے۔

فائدہ: جس نے صبح و شام یہ پڑھ لیا اُس دن اور رات کا شکر ادا ہو گیا۔

(ابوداؤد: 5073)

ترجمہ: اللہ پاک ہے اور اُسی کی تعریف ہے۔

فائدہ: جو صبح و شام سو مرتبہ پڑھے، قیامت کے دن کوئی اس سے افضل عمل نہیں لا سکتا سوائے اُس کے جو اتنا یا زیادہ پڑھے۔

(صحیح مسلم: 6843)

ترجمہ: اے اللہ! میں نے صبح کی، میں تجھے، تیرے عرش اٹھانے والے فرشتوں، تمام فرشتوں اور تیری تمام مخلوق کو گواہ بناتا ہوں کہ بیشک تُو ہی اللہ ہے، تیرے سوا کوئی معبود نہیں، تُو اکیلا ہے، اور محمد ﷺ تیرے بندے اور رسول ہیں۔

فائدہ: اُس دن کے گناہ معاف ہو جاتے ہیں، اور ایک مرتبہ پڑھنے پر جسم کا چوتھائی حصہ جہنم سے آزاد ہو جاتا ہے۔

(ابوداؤد: 5078، 5069)

ترجمہ: اے اللہ! میں نے تیری جانب سے نعمت، عافیت اور پردہ پوشی کی حالت میں صبح کی، پس تُو مجھ پر اپنی نعمت، عافیت اور پردہ پوشی کو دنیا و آخرت میں مکمل فرما۔

فائدہ: آپ ﷺ نے فرمایا: ”کان حقًّا علی اللہ عزّ وجلّ أن یتمّ علیہ نعمتہ“ — اللہ نے اپنے ذمہ لازم کیا ہے کہ اُس پر اپنی نعمتیں مکمل فرما دیں گے۔

(ابنِ سنی: 55)

ترجمہ: اللہ جو چاہے، گناہوں سے بچنے کی طاقت اور نیک کام کرنے کی قوت صرف اللہ تعالیٰ ہی کی جانب سے ہے، میں گواہی دیتا ہوں کہ اللہ ہر چیز پر قدرت رکھنے والا ہے۔

فائدہ: آپ ﷺ نے فرمایا: ”رُزِقَ خَیْرَ ذٰلِکَ الْیَوْمِ، وَصُرِفَ عَنْہُ شَرُّہٗ“ — اُسے اُس دن کا بہترین رزق عطا کیا جائے گا اور اُس دن کا شر اُس سے دور کر دیا جائے گا۔

(ابن السنی: 53)

ترجمہ: تمام تعریفیں اللہ ہی کیلئے ہیں جو میرا پروردگار ہے، میں اُس کے ساتھ کسی بھی چیز کو شریک نہیں ٹھہراتا، اور میں گواہی دیتا ہوں کہ اللہ کے سوا کوئی معبود نہیں ہے۔

فائدہ: آپ ﷺ نے صبح کے وقت یہ کلمات پڑھنے والے کے بارے میں فرمایا: ”ظَلَّ یُغْفَرُ لَہٗ ذُنُوْبُہٗ حَتّٰی یُمْسِيَ“ یعنی وہ شام ہونے تک دن بھر اِس حالت میں گزارتا ہے کہ اُس کی مغفرت کر دی جاتی ہے۔

(طبرانی کبیر: 635)

ترجمہ: میں اللہ تعالیٰ کے تمام کلمات (یعنی اسماء و صفات) کی پناہ میں آتا ہوں ہر شیطان اور ڈسنے والے جانور سے اور ہر ملامت کرنے والی آنکھ سے۔

فائدہ: نظرِ بد سے حفاظت کیلئے بہترین کلمات ہیں، نبی کریم ﷺ حضرت حسن و حسین رضی اللہ عنہما کو اِنہی کلمات کے ذریعے اللہ کی پناہ میں دیتے تھے، اور فرماتے تھے کہ حضرت ابراہیم علیہ السلام بھی اپنے بیٹوں حضرت اسحاق اور حضرت اسماعیل علیہما السلام کو اِنہی کلمات کے ذریعے اللہ کی پناہ میں دیتے تھے۔

(بخاری: 3371)

ترجمہ: میں اللہ تعالیٰ کے تمام کلمات (یعنی اسماء و صفات) کی پناہ میں آتا ہوں اُس کے غضب و غصہ سے اور اُس کے عذاب سے اور اُس کے بندوں کے شر سے اور شیاطین کے وسوسوں سے، اور اے میرے پروردگار! میں تیری پناہ چاہتا ہوں اِس سے کہ وہ (شیاطین) میرے پاس بھی آئیں۔

فائدہ: یہ کلمات خوف و گھبراہٹ سے حفاظت اور اُس کیفیت کو دور کرنے کیلئے بہت مفید ہیں، نبی کریم ﷺ خوف و گھبراہٹ کی حالت میں اور بالخصوص نیند میں ڈر جانے کی صورت میں اِن کلمات کو پڑھنے کی تلقین فرماتے تھے۔

(ابوداؤد: 3893، ترمذی: 3528)

ترجمہ: میں اللہ تعالیٰ کے تمام کلمات کی پناہ میں آتا ہوں جن سے نہ کوئی نیک آگے بڑھ سکتا ہے اور نہ گناہ گار، ہر اُس چیز کے شر سے جس کو اللہ نے پیدا کیا، پھیلایا اور وجود دیا، اور ہر اُس چیز کے شر سے جو آسمان سے اترتی ہے اور جو آسمان پر چڑھتی ہے، اور ہر اُس چیز کے شر سے جو زمین کے اندر پیدا ہوتی ہے اور جو زمین سے (پھوٹ کر) نکلتی ہے، اور رات دن کے فتنوں کے شر سے، اور رات دن کے (ناگہانی) واقعات و حادثات کے شر سے، بجز اُس اچھے واقعہ کے جو خیر لے کر آئے، اے رحمٰن!

فائدہ: شیاطین، جنات اور ہر قسم کے پوشیدہ و ظاہری شر سے حفاظت کے جامع کلمات ہیں۔

(مسند احمد: 15461)

ترجمہ: میں اللہ عظیم کی پناہ میں آتا ہوں جس سے کوئی چیز بڑی نہیں، اور اُس کے تمام کلمات (یعنی اسماء و صفات) کی پناہ میں آتا ہوں جن سے نہ کوئی نیک بچ سکتا ہے نہ بد، اور اللہ تعالیٰ کے تمام بہترین ناموں کی (پناہ میں آتا ہوں) جن کو میں جانتا ہوں اور جن کو میں نہیں جانتا، ہر اُس چیز کے شر سے جس کو اللہ نے پیدا کیا، پھیلایا اور وجود دیا۔

فائدہ: یہ کلمات جادو اور سحر کے اثرات سے بچنے کیلئے بہت ہی مفید اور بہترین کلمات ہیں، حضرت کعب احبار رحمہ اللہ اِن کلمات کو پڑھتے اور اِن کی تلقین فرماتے تھے۔

(موطأ امام مالک: 1748)

ترجمہ: اے اللہ! میں تیری پناہ میں آتا ہوں اِس سے کہ میں جانتے بوجھتے تیرے ساتھ کسی کو شریک ٹھہراؤں، اور میں تجھ سے مغفرت چاہتا ہوں اُس (شرک) سے جس کو میں نہیں جانتا۔

فائدہ: اِس اُمّت کے اندر چیونٹی کی آہٹ سے بھی زیادہ مخفی اور پوشیدہ شرک رکھا گیا ہے، اور اُس چھوٹے بڑے تمام طرح کے شرک سے بچنے کیلئے نبی کریم ﷺ نے مذکورہ کلمات تین مرتبہ روزانہ پڑھنے کی تلقین فرمائی ہے۔

(مسند ابویعلیٰ موصلی: 58)

ترجمہ: میں شیطان مردود سے اللہ تعالیٰ کی پناہ میں آتا ہوں جو سننے اور جاننے والا ہے۔

فائدہ: حدیث کے مطابق مذکورہ تعوّذ صبح کے وقت پڑھنے والا شام تک شیطان سے محفوظ ہو جاتا ہے (عمل الیوم و اللیلۃ لابن السنی: 49)۔ اور اگر تعوّذ کے اِنہی کلمات کو تین مرتبہ پڑھنے کے بعد سورۃ الحشر کی آخری تین آیات ”ھُوَ اللّٰہُ الَّذِیْ لَآ اِلٰہَ اِلَّا ھُوَ عَالِمُ الْغَیْبِ“ سے سورت کے آخر تک پڑھ لی جائیں تو حدیث کے مطابق صبح کے وقت پڑھنے پر شام تک ستر ہزار فرشتے اُس کیلئے رحمت کی دعا کرتے رہتے ہیں، اور اگر وہ اُس دن مر جائے تو شہادت کی موت مرتا ہے۔

(ابن السنی: 49، ترمذی: 2922)

ترجمہ: اے اللہ! تُو میرا پروردگار ہے، تیرے سوا کوئی معبود نہیں، میں نے تجھ ہی پر بھروسہ کیا اور تُو بزرگی والے عرش کا رب ہے، جو اللہ نے چاہا وہ ہو گیا اور جو نہیں چاہا وہ نہیں ہوا، گناہوں سے بچنے کی طاقت اور نیک کام کرنے کی قوت صرف اللہ ہی کی جانب سے ہے جو عظمت والا بلند و برتر ہے۔ میں جانتا ہوں کہ اللہ ہر چیز پر قدرت رکھتا ہے اور بیشک اللہ تعالیٰ نے علم کے اعتبار سے ہر چیز کا احاطہ کر رکھا ہے۔ اے اللہ! میں تیری پناہ چاہتا ہوں اپنے نفس کے شر سے اور ہر اُس جاندار کے شر سے جس کی پیشانی تیرے قبضے میں ہے، بیشک میرا رب سیدھے راستے پر ہے۔

فائدہ: مصائب، حوادث اور ہر جاندار کے شر سے حفاظت کے جامع کلمات ہیں۔

(ابنِ سنی: 54)

ترجمہ: اے اللہ! اے ساتوں آسمانوں اور عظیم عرش کے پروردگار! میرے ہر اہم کام کیلئے کافی ہو جا، جس طرح تُو چاہے، جس جگہ سے تُو چاہے اور جہاں کہیں تُو چاہے۔ اللہ میرے دین کیلئے کافی ہے، اللہ میری دنیا کیلئے کافی ہے، اللہ اُس کام کیلئے کافی ہے جو مجھے فکر میں ڈالے، اللہ کافی ہے اُس کے مقابلے میں جو مجھ پر زیادتی کرے، اللہ کافی ہے اُس کے مقابلے میں جو مجھ سے حسد کرے، اللہ کافی ہے اُس کے مقابلے میں جو میرے ساتھ برائی کا ارادہ کرے، اللہ کافی ہے موت کے وقت، اللہ کافی ہے قبر کے سوال کے وقت، اللہ کافی ہے میزان کے وقت، اللہ کافی ہے پلِ صراط کے وقت۔ مجھے اللہ کافی ہے، اُس کے سوا کوئی معبود نہیں، اُسی پر میں نے بھروسہ کیا اور وہی عرشِ عظیم کا رب ہے۔

فائدہ: غم، فکر اور پریشانیوں سے حفاظت اور ہر اہم معاملے میں اللہ کی کفایت حاصل ہوتی ہے۔

(ابنِ سنی)

ترجمہ: مجھے اللہ کافی ہے، اُس کے سوا کوئی معبود نہیں، اُسی پر میں نے بھروسہ کیا اور وہی عرشِ عظیم کا رب ہے۔

فائدہ: مذکورہ کلمات صبح و شام (سات مرتبہ) پڑھنے والے کے بارے میں منقول ہے: ”کَفَاہُ اللّٰہُ مَا أَھَمَّہٗ“ یعنی اُس کے ہر اہم کام کیلئے کفایت ہو جائے گی۔

(ابوداؤد: 5081)

ترجمہ: اے اللہ! تیرے لئے ہی ساری تعریفیں ہیں، تیرے سوا کوئی معبود نہیں، تُو میرا رب اور میں تیرا بندہ ہوں، میں تجھ پر اپنے دین کو خالص کرتے ہوئے ایمان لایا، میں نے اپنی استطاعت کے مطابق تیرے عہد اور وعدہ کے (پورا کرنے کے) ساتھ صبح کی، میں تیری جانب رجوع کرتا ہوں اپنے عمل کے شر سے، اور تجھ سے اپنے گناہوں کی معافی مانگتا ہوں، وہ تمام گناہ جو تیرے سوا کوئی معاف نہیں کر سکتا۔

فائدہ: حضرت ابو امامہؓ فرماتے ہیں کہ نبی کریم ﷺ کا ارشاد ہے: جس نے یہ کلمات صبح کے وقت (تین مرتبہ) پڑھے، اُس کے لئے جنت کا پروانہ لکھ دیا جاتا ہے۔

(عمل الیوم واللیلۃ لابن السنی (حدیثِ ابو امامہؓ))

ترجمہ: اے اللہ! اے ساتوں آسمانوں اور اُن تمام چیزوں کے پروردگار جن پر وہ آسمان سایہ فگن ہیں، اور اے زمینوں اور اُن تمام چیزوں کے پروردگار جنہیں اُن زمینوں نے اُٹھایا ہوا ہے، اور اے شیطانوں اور اُن تمام چیزوں کے پروردگار جنہیں اُن شیاطین نے گمراہ کیا ہے، تُو مجھے اپنی ساری مخلوقات کے شر سے پناہ دیدے اِس بات سے کہ اُن میں سے کوئی مجھ پر زیادتی یا ظلم کرے، تیری پناہ غالب ہے، تیری تعریف بہت بڑی ہے، اور تیرے علاوہ کوئی معبود نہیں اور تیرے سوا کوئی عبادت کے لائق نہیں۔

فائدہ: ہر قسم کی مخلوق — انسان، جن اور شیاطین — کے شر و ظلم سے حفاظت۔

(ابوداؤد: 5052، ترمذی: 3523)

ترجمہ: لہٰذا اللہ کی تسبیح بیان کرو اُس وقت بھی جب تمہارے پاس شام آتی ہے اور اُس وقت بھی جب صبح طلوع ہوتی ہے، اور اُسی کی حمد ہے آسمانوں میں بھی اور زمین میں بھی اور سورج ڈھلنے کے وقت بھی اور اُس وقت بھی جب تم پر ظہر کا وقت آتا ہے۔ وہ جاندار کو بے جان سے نکالتا ہے اور بے جان کو جاندار سے نکالتا ہے اور وہ زمین کو اُس کے مردہ ہو جانے کے بعد زندگی بخشتا ہے اور اِسی طرح تم کو (قبروں سے) نکال لیا جائے گا۔

فائدہ: مذکورہ تینوں آیات صبح و شام پڑھنے والے کے دن یا رات میں رہ جانے والے تمام معمولات کی تلافی ہو جاتی ہے۔

(سورۃ الروم: 17، 18، 19 — ابوداؤد: 5076)

ترجمہ: تمام تعریفیں اللہ کیلئے ہیں جس کی عظمت کے سامنے ہر چیز جھکی ہوئی ہے، اور تمام تعریفیں اللہ کیلئے ہیں جس کی عزّت کے سامنے ہر چیز ذلیل ہے، اور تمام تعریفیں اللہ کیلئے ہیں جس کی سلطنت کے سامنے ہر چیز عاجز ہے۔

فائدہ: حضرت اُمّ سلمہؓ سے مروی ہے کہ نبی کریم ﷺ نے فرمایا: جو شخص صبح کے وقت یہ دعا پڑھ لے اُس کیلئے ایک لاکھ نیکیاں لکھی جاتی ہیں، اور اگر اُس دن اُس کا انتقال ہو جائے تو اُس کی روح کو سبز پرندوں کی شکل دے کر جنّت میں چھوڑ دیا جائے گا، جو جنّت میں جہاں چاہیں گے چرتے پھریں گے۔

(الدعاء للطبرانی: 325)

ترجمہ: اللہ کیلئے تسبیح ہے اُن تمام مخلوقات کی تعداد کے برابر جو اُس نے آسمان میں پیدا کی، اللہ کیلئے تسبیح ہے اُن تمام مخلوقات کی تعداد کے برابر جو اُس نے زمین میں پیدا کی، اللہ کیلئے تسبیح ہے اُن تمام مخلوقات کی تعداد کے برابر جو آسمان و زمین کے درمیان پیدا کی، اللہ کیلئے تسبیح ہے اُن تمام مخلوقات کی تعداد کے برابر جو وہ (ازل سے ابد تک) پیدا کرنے والا ہے، اور ”اَللّٰہُ اَکْبَرُ“ بھی اِسی طرح ہے، ”اَلْحَمْدُ لِلّٰہِ“ بھی اِسی طرح ہے اور ”لَا حَوْلَ وَلَا قُوَّۃَ اِلَّا بِاللّٰہِ“ بھی اِسی طرح ہے۔

فائدہ: یہ مختصر لیکن بہت ہی جامع کلمات ہیں، جن میں بہت ہی کم وقت میں بہت زیادہ اجر و ثواب حاصل ہو جاتا ہے۔

(نسائی، عمل الیوم واللیلۃ — مسند احمد)

ترجمہ: پاک ہے اللہ کی ذات جو عظمت والی ہے اور اُسی کیلئے ساری تعریف ہے، اور گناہوں سے بچنے کی طاقت اور نیک کام کرنے کی قوت صرف اللہ ہی کی جانب سے ہے۔

فائدہ: فجر کی نماز کے بعد تین مرتبہ یہ کلمات پڑھنے کی برکت سے اللہ تبارک و تعالیٰ پانچ بڑی بیماریوں یعنی جنون، جُذام، اندھا پن، برص اور فالج سے حفاظت فرما دیتے ہیں۔

(عمل الیوم واللیلۃ لابن السنی: 133، 134)

ترجمہ: اے اللہ! اے ساتوں آسمانوں اور عظیم عرش کے پروردگار! میرے ہر اہم کام کیلئے کافی ہو جا، جس طرح تو چاہے، جس جگہ سے تو چاہے اور جہاں کہیں تو چاہے۔ اللہ میرے دین کیلئے کافی ہے، اللہ میری دنیا کیلئے کافی ہے، اللہ میرے ہر اہم معاملے کیلئے کافی ہے، اللہ اُس کے مقابلے میں کافی ہے جو مجھ پر زیادتی کرے، اللہ اُس کے مقابلے میں کافی ہے جو مجھ سے حسد کرے، اللہ اُس کے مقابلے میں کافی ہے جو میرے ساتھ بُرا مکر کرے، اللہ موت کے وقت کافی ہے، اللہ قبر کے سوال کے وقت کافی ہے، اللہ میزان کے وقت کافی ہے، اللہ پُلِ صراط پر کافی ہے، اللہ ہی کافی ہے، اُس کے سوا کوئی معبود نہیں، اُسی پر میں نے بھروسہ کیا اور وہی عرشِ عظیم کا رب ہے۔

فائدہ: دنیا و آخرت کے تمام اہم معاملات میں اللہ کی کفایت اور حفاظت حاصل ہوتی ہے۔

(الدعاء للطبرانی — عمل الیوم واللیلۃ لابن السنی)